بعد الرحيل

اليوم .. تمر عشرة أيام على رحيل أعز صديقاتى

لم أكن لأتخيل نفسى يوما أن أحيا بدونها

فقد كانت لى الهواء والماء

وضحكة القلب وقت الصفاء

كتبت لها وبها وعنها

ما كنت أحسب الحب يملكنى

ولا كان يوما رحيل الشمس يعنينى

ولا كانت دموع الشوق صاحبتى

تباعدنى عنها بلا رفق وتدنينى

حتى أصاب الحب مملكتى

فصرت أهوى بلا طوق لينجينى

وصار حالى كما لو أن بى مرضا

وعجيب أمرى فلا طب يداوينى

ولو علموا أن الهوى دائى

وأن قدوم من أهوى سيشفينى

لساروا اليها وأنفاسى تصاحبهم

يعذبنى البعد عنها ويشقينى

أخبروها أنى جسد بلا روح

والصبر مر والوجد يردينى

رحلت وتركت عذابات تلاحقنى

آه لو أرسلت منها ما يواسينى

لو كنت أقدر كنت أكرهها

أو أن أخرى بذات الحب تحوينى

غير أنها أخذت وما أبقت

سوى ذكرى وبعض الدمع يروينى

يا ليتنى أوصدت باب الحب

فلا رياح منه تأتينى

وما تركت قيود الرق فى يدها

وبعض الكبر منى يقوينى

وكنت كتمت الحب فى قلبى

لأن قليل البوح يرضينى

آه على نفسى وقد صارت وحيدة

ولا أحد باسمى ينادينى

آه على كأس صار فارغا

وكنت أحسبه يوما سيسقينى

نضبت دموعى وجفت مدامعها

وقلبى يحتضر ويوصينى

اياك أن تنسى يوما حبها

ذكراها كانت ومازالت ستحيينى

لعلك هانئة الآن .. صديقتى

أحكى لمين .. وأشكى لمين

كان يا ما كان

فى سالف العصر والأوان

واحدة من عجايب الدنيا السبعة

اسمها الأهرامات

ولما بعيد عنكم واحد سويسرى اتلطش فى نافوخه

قال نختار سبع عجايب جداد

قامت الدنيا كلها سمعت كلامه مش عارفه ليه

واحنا طبعا كالعادة نايمين على وداننا

تم الاستفتاء والتصويت عبر الانترنت

واختار المحكمين عجايب سبعة ومش فيهم الأهرامات

رغم انها العجيبة الوحيدة الباقية من السبعة الأصلية

وعلشان كده محدش اختارها

لأ وايه بقى

اختاروا آثار ماشوبيشو وهى آثار قبيلة الأنكا فى بيرو

يا صلاة الزين

ماشوبيشو .. والنبى ده اسم يقابلوا بيه وجه كريم

يعنى احنا عندنا 3 أهرامات طول بعرض يسدوا عين الشمس

وواقفين على حيلهم من أكتر من 7 آلاف سنة

ومعبد أبوسمبل .. أكبر معبد صخرى فى العالم

وبتتعامد فيه الشمس على وجه رمسيس مرتين فى السنة

والناس بتجيلهم من كل الدنيا

لأ يسيبوهم ويختاروا ماشوبيشو

والمسئولين بتوعنا بقى جزاهم الله كل خير

لم يحركوا ساكنا

وسلملى على بارنيطة زاهى حواس

أتمنى له الخير

من فترة عايزة أكتب البوست ده

بس مش كنت عارفة أكتب ايه

وأعبر ازاى عن حالة المرارة اللى حسيتها

انا بكتب رسالة لصديقة

أتمنى انها تكون لسه بتابع مدونتى زى ما بتابع مدونتها

عايزة أقولها انتى فين ؟؟

ليه بسأل عنك ومش بتسألى عنى ؟؟

من امتى واحنا بعيد عن بعض كده ؟؟

من امتى حد فينا بيتعب ومش بيلاقى التانى جنبه ؟؟

طيب انتى وحشتينى

يا ترى أنا كمان وحشتك ؟؟

يا ترى بتفكرى فيا ؟؟

يا ترى مقلقتيش عليا ؟؟

يا ترى فيه سبب للفجوة اللى حصلت بيننا دى ؟؟

طيب لو كنت غلطت فى حقك

مش كان المفروض تعاتبينى

ولا على طول كده تعاقبينى

وعموما اذا كان الغلط منى سامحينى

بس هوه فين الغلط ؟؟

مستنياكى تبعتيلى الرسالة اللى أنا بحبها

وتقوليلى : وحشتينى يا بنوتة

فاكرة الرسالة اللى بعتهالك وقلت لك

يا ساكنا قلبى كفاك غيابا

ألا ترى بفضا العيون عتابا

فاكرة آخر مرة لما اتصلت بيكى يوم 3/6 عيد ميلادك ؟؟

الخط قطع وقلتيلى هاكلمك بعد ساعة

تخيلى ان الساعة دى بقى لها شهر و5 أيام

عارفة فيلم فؤاد المهندس وشويكار

لما نزلت تجيب طابع بوستة واختفت 15 سنة

يا ترى انتى بقى هتكلمينى بعد 15 سنة ؟؟

بقى عندى احساس انى بتطفل على حياتك

والاحساس ده بيجرحنى ويدبحنى

مكان فى قلبى زى ما هوه

شقة أربع حجرات وصالة وعفشة مياه

مستنياكى تنوريها تانى

بس هاقولك ايه يا كنز حياتى

على رأى أنغام

هاتمنى له الخير

ايه يعنى يفوتنى وينسانى

ما هو ياما اتحمل علشانى

ما هو ياما كان قلبه عليا

هاتمنى له الخير

ما هو قبل ما يجرحنى داوانى

كان عمرى وكان كل زمانى

كان قلبى وروحى وعنيا

اسمع : هاتمنى له الخير .. أنغام