حبيبتى .. سامحينى

مش عارفة أبتدى ازاى وأقول ايه

أنا حاسة ان قلبى اتوجع

الحكاية ان أغلى صديقاتى اتعرضت لموقف عصيب جدا

هى أصغر منى فى السن علشان كده أنا بعتبرها أختى وصديقتى ومتستغربوش وبنتى كمان

المشكلة كانت مصيبتها فى أقرب الناس لقلبها : حبيبها

ربنا استرد وديعته واختاره بجواره

وأنا عرفت الخبر قبلها وكان لازم أخبى عنها الخبر بأى شكل لأن كان عندها امتحانات فى الكلية

والنهاردة كان موعدها مع الألم واضطريت أصارحها باللى حصل

متخيلين الموقف

عارفين قد ايه كان صعب عليها

حاسين كمان قد ايه كان صعب عليا أنا كمان

فاهمين يعنى ايه انك تكون سبب فى جرح أقرب الناس لقلبك

يعنى ايه تكون سبب فى نزول دموعه

ازاى قلبك بيتقطع وانت مضطر تضربه بسكينة باردة جوة قلبه

حاسين قد ايه ممكن يرفض حضنك من كتر صدمته من كلامك

ليه أنا بالذات ؟؟

ليه أنا اللى أبلغها يمكن بأسوأ خبر هتسمعه فى حياتها على الاطلاق ؟

كان نفسى أخبيها فى حضنى وأبوس ايديها وأمسح دموعها

كان نفسى أخفف حزنها وأمحى ألمها

ياريتنى أقدر

لو بايدى كنت أهدى له عمرى كله يقعد بيه جنبها ويفرح قلبها بس ماشوفش دمعة واحدة من دموعها

دموعها كانت بتكوى قلبى

ليه أنا أكون سبب فى لحظة عذاب تعيشها ؟

دى بنتى قبل ما تكون صاحبتى

عارفين يعنى ايه حد يجرح ضناه

حاسة انى كنت بادبحها وأنا ببلغها

كنت حاسة انى فى منتهى القسوة

مش عارفة أوصف احساسى

بس كل اللى أقدر أقوله انى مش قادرة أسامح نفسى انى اتسببت فى لحظة ألم وتعاسة ليها

واللى أقدر أطلبه منك انكم تدعوا ان ربنا يهون عليها

واللى أقدر أطلبه منها انها تغفر لى جرأتى فى تعذيبها بالخبر ده

حبيبتى ونور عينى .. سامحينى

My baby : I'll always be here for you.