الجمل برك

الجمل رمز التحمل .. لما بيتعب وبيقعد بعد ما يهلك من التعب بيقولوا عليه : برك

وأنا حاسة بالتعب وان الدنيا ضيقة

حاسة ان الهوا بيتسحب من جوايا

قاسيت الألم والوحدة

قاسيت الحزن والمرارة

وصبرت

والصبر مش غريب عنى

وعارفة ان فيه ناس كتير تعبانين أكتر منى

عملت عملية واتنين والحمد لله قمت بالسلامة ودى لوحدها أكبر نعمة

بس لسه عندى أهم مرض : الاصرار على الألم

مش منى .. من الدنيا

وعلشان تكمل بقى

اطلبوا معايا الرحمة لواحد من أعز أصدقائى

د . هشام بدر .. 27 عاما

توفاه الله وهو فى رحلة علمية وترك لنا فراغ كبير

نتذكر فيه أحلامه وأفكاره وطموحاته وآلامه ودموعه وضحكاته

حاسة انى مش فاهمة الدنيا ومش عارفة فى ايه

ايه الصراعات الكتيرة دى ؟؟

خلافات وخناقات وحروب وطعنات

ليه ؟

علشان ايه ؟

ايه القسوة دى كلها ؟؟

حاسة ان الدنيا كسرتنى

بحاول أكسب منها ولو جولة

يا ترى هاقدر ؟؟؟

الله أعلم

أصلى خلاص ... بركت