رسالة الى فلان

فى يوم جميل خااااااااالص كان اسمه عيد الحب دخلت حجرة العمليات

بصراحة حسيت ان اللى بيحصل فى الأفلام ده أى كلام

أنا بقى كنت مستنية ييجى تروللى العمليات عندى فى أوضتى

وبعدين الناس اللى معايا يمسكوا ايدى ويجروا جنب التروللى وهو داخل على العمليات

ويقولوا لى اطمنى .. لا اله الا الله

زى الأفلام يعنى

لقيتهم منزلينى فى الأسانسير على رجلىّ

مع انى دافعة فلوس والله

كل خلق الله كانوا موصيينى أدعيلهم أول ما أدخل أوضة العمليات

وأنا قلت لهم طبعا ان شاء الله

بس الشهادة لله أوضة العمليات دى لها طلة كده تنسيك اسمك

نمت على السرير

واستنيت انهم هيقولوا لى عدى من 1 - 10 لحد البنج ما يشتغل وكده

والله ما فى حاجة من دى حصلت خالص

أنا يادوب أخدت البنج وحاولت بعدها انى أفتكر عاوزة أدعى لمين

انى أفتكر ... أبدا

ركزت أوى وحاولت أدعى لناس كتير

ولما لقيتنى بدأت أفصل خالص

قلت يارب .. يارب أنا بادعى لكل الناس .. كل الناس

بس تصدقوا .. نسيت أدعى لنفسى

ولما فوقت وحسيت بالألم الشديد مكان العملية

قلت الحمد لله الذى عافانا

وطلبت انى أتوضا وأصلى

وصليت وأنا نايمة على السرير

صليت بقلبى وعنية ورقبتى لأن دى الحاجات الوحيدة اللى كنت قادرة أحركها

بس احساسك وانت بيتركب لك مونيتور القلب والأوكسجين وأجهزة بتصفر من حواليك

وأصوات واضاءة ومشارط ودكاترة وتمريض

وحقن وكانيولا ومحاليل وأدوية

وقلق وألم وخوف ورهبة

ولسان بيحمد ويشكر ويقول يارب

احساس غريب .. غريب جدا صعب أوصفه

ولما فتحت عنيا لقيت مظاهرة حب من الأهل والأصدقاء

وكملت معاكم هنا فى المدونة باحساسكم الجميل

مش عارفة أشكر مين ولا مين

وأهدى محبتى لمين ولا مين

أكيد ليكم كلكم .. كلكم .. كلكم

وفى يوم العملية جالى أرق وأحلى بوكيه ورد

من أخ عزيز على قلبى جدا

وبعد اذنكم عاوزة أبعت له رسالة

أنا عارفة ايه اللى بيدور جواك وحاسة بحيرتك

حاسة باحساسك

حاسة بيك ومشاعرك بتتقلب جواك يمين وشمال

عارفة انك تعبت من شعور العاطفة الواحدة

تجربة حب لم تكن ناجحة

وايه المشكلة ؟؟

فى الحب مفيش حد بيكسب وحد بيخسر

الحب لعبة قوانينها غريبة والحكم فيها صعب يكون عادل

تسمحلى أقول لك نصيحة

اذا أردت أن تحب

فعليك أن تحب حالا ودائما وكثيرا

فأنا عندما أحب

كل ميكروفونات العالم تركب على جسدى

وتنطق فى نفس واحد : بحبك