تدبيسة

صديقى وزميلى الصيدلى الأغلبية الصامتة - الله يخليه - لبسنى تاج

أحب شخص لقلبك فى هذه الحياة ؟

أمى طبعا وبالتأكيد وعلى طووووووووول

انسان مستعد تضحى بحياتك علشانه ؟

بدون تفكير برضه : أمى

انسان كرهته لدرجة الجنون وتمنيت لو تمسك سكينة وتغرزها فى قلبه وتقف تبص لجثته وتشفى غليلك ؟

أنا بطبعى قلبى مش أسود

بس فيه شخصية آذتنى جدا وبلغ الأذى مداه وأتمنى أعمل مع الشخصية دى كل ده

ما هو اسم أجمل كتاب كتبه بشر قرأته ومحتفظ به حتى الآن ؟

كتاب لأنيس منصور اسمه : يا من كنت حبيبى

أهم جهاز منزلى بتستخدمه كتير ومتعلق بيه ؟

الكمبيوتر حبيب الملايين

مكان تحس بالراحة عندما تدخله ؟

لما بادخل أصلى فى جامع

شىء تحس بالراحة النفسية عندما تنظر اليه ؟

البحر والطيور

مكان تحس فيه بالحنين الى شىء لا تدرى ما هو ؟

بيت العيلة فى بلدنا

أجمل مدينة زرتها داخل مصر ؟

شرم الشيخ

أجمل مكان طبيعى رأيته فى مصر ؟

البرزخ اللى فى رأس البر

شخصية كارتونية بتحبها ؟

دونالد .. غباؤه غير عادى بس بموت فيه

نوع هاتفك المحمول

نوكيا 7610

سرعة بروسيسور جهازك وحجم الهارد ؟

ايه وجع الدماغ ده

المساحة التى تشغلها المواد الاسلامية على جهازك ؟

لا بأس بها

عندى القرآن كامل بصوت الشيخ جبريل وموسوعة الحديث النبوى الشريف

بالاضافة الى بعض الأذكار والأدعية والرقية الشرعية

وبشكل عام أحب أمسك كتاب من كتب الدين أكتر ما أقرأ على الكمبيوتر

نفس المساحة السالف ذكرها فى قلبك ؟

دى حاجة بينى وبين ربنا مفيش حد له الحق انه يسألنى عنها

أهم هدف فى حياتك الآن ؟

انى أنجح فى شغلى ودراستى العليا وأتمنى ربنا يكرمنى بالزوج الصالح

مواصفات فتى الأحلام بالنسبة لك ؟

طيب وابن حلال .. يحبنى ويتقى ربنا فيّا

وعلى فكرة أنا لسه مؤمنة بقصة فارس الأحلام اللى يحتوي ويجيب ورد

والاقى جنبه الحماية ومعاه التفاهم

ويساعدنى اننا نبنى أسرة سعيدة مستقرة

صف ما يأتى

شعورك لما بتسمع كلمة مصر ؟

قصة الحب بينى وبين البلد دى مش أى كلام يوصفها

لما بتسمع كلام عن اليهود ؟

لأ نعدل السؤال .. لما بسمع عن الصهاينة

بحس انى عايزة أقطعهم بأسنانى

لما بتشوف ضابط شرطة ؟

عادى .. زى أى مهنة فيها الكويس والوحش

لما بتشوف الكناس العجوز فى الطريق ؟

بحركة لا ارادية بعدى جنبه وأقول له الله يعينك

أفكارك تجاه شاب لابس جلبية بيضاء قصيرة وفى ايده مصحف وفى جيبه السواك وله لحية ؟

مش الزى اللى بيحدد قوة الايمان المهم الاحتشام واللى فى القلب

احساس يراودك فى اشارة مرور مغلقة بسبب مسئول كبير ؟

طبعا بتضايق لأنى معتقدش ان ده بيحصل غير عندنا بس

نبلى مين بقى بالتاج ده ؟

ما علينا

بعدك على بالى

لما أغمض عينى

لما أغمض عيني فجأة

ألقى صورتك تستخبى بين جفوني

أحاول أفتحهم شوية

ألقى فرحة واقفة تحرس باب عيوني

و لما أنطق مرة إسمك

روحي تسبق نور حروفه على الشفايف

و ألقى قلبي نبضه يجري

رغم أنه مالوش عيون .. بس شايف

يا حبيبتي أنا ظل سارق

كل نور الدنيا ليكي

يا حبيبتي أنا بحر غارق

موجي سابني وراح عليكي

يا حبيبتي أنا نيل و طمي

لما تبقي نخيل وورد

يا حبيبتي أنا نور و ضي

لما تبقي ليل و برد

يا حبيبتي أنا ملك إيدك بالمشاعر

وانتى شعري لو في يوم بقى إسمي شاعر

الناجح يرفع ايده

قررت قطع الأجازة التدوينية لأمر هام

شرفنى مجموعة من المدونين باختيار موضوع لى كأفضل موضوع أدبى

وذلك فى مسابقة أفضل موضوع

شكرا جزيلا لمن أعطانى هذه الثقة

وتحية خاصة لكل المبدعين الذين شاركوا فى هذا العرس الأدبى

وكل الشكر والتحية لمجهود أصحاب الفكرة : صرصارة و مهند

الى من يهمه الأمر

أستأذنكم فى اجازة .. استراحة

الى لقاء باذن الله

سأكتفى بالمشاهدة

عندما لا تجد لحياتك غاية

عندما تقفل القلوب عن سماعك

عندما لا تجد اليد التى لا تمسح دموعك

قبل أن تتساقط من على خديك

متناثرة فى الأرجاء

ترسم صورة لمأساتك

تحكى جزءا من همومك وأحزانك

دموع من نار

تحمل حرارة النار التى تجول فى صدرك

تحمل الأثكال التى يختزنها قلبك

عندما تكون هكذا

وعندما تنهال من عينيك هذه الدموع

وتترك لعينيك العنان

لتذرف هذه الدموع الحارقة

فلم يعد هناك من يسمعك

ولم يعد هناك من يمسح دمعتك

فلك أن تتحدث أنت وقلبك لوحدكما

وأن تمسح بنفسك دمعاتك

وان لم تفعل ذلك

فلا تأمل فى حل أفضل

فربما عصرنا قد خلا من المعجزات

أو ليس من معجزات عصرنا

أن تشعر بدفء انسان من حولك

أن تجد من يشاطرك كل ما يختلج به فؤادك

هذا هو واقعنا

نحيا فى غربة نفسية

حتى ونحن فى وسط أحبابنا

نحيا فى وحدة أبدية

هذا ما رأته عيناى

والآن لك الخيار

فاما أن تأسى لنفسك

وتداوى جرحك النازف وحدك

أن تعيش ترثى نفسك

وتؤنس نفسك فى وحدتك

واما لتختار الموت

فهو أقرب بكثير

من أن تفكر فى قلب يستطيع احتمالك

ولأنى لا أملك الاختيار

ويصعب علىّ اتخاذ القرار

فسأكتفى بالمشاهدة

ملحوظة : عثرت على هذه الورقة بين أوراقى المبعثرة

ولا أذكر كيف ومتى ولأى سبب كتبتها

ولكنها تعبر عن حالة

توضيح

بعد ما نشرت البوست السابق

لفت نظرى تعليق الباشمهندسة الصغنونة نوران

الفكرة الموجودة عند الناس ان الصيدلى بيبيع أدوية

واحتراما منى لمهنتى كان من اللازم هذا التوضيح

لقب دكتور يطلق على الكثيرين

الطبيب .. طبيب الأسنان .. حامل الدكتوراة فى أى علم من العلوم

انما لقب صيدلى لا يطلق الا على خريج كلية الصيدلة فقط

وكان من هنا بداية التميز

فقد كان من أهم أحلامى هو الالتحاق بكلية الصيدلة

مش قادرة أوصف لكم علاقتى بالمعامل فى الكلية وقد ايه كنت بستنى سكشن العملى

كنت دايما بحس انى بعمل حاجة جديدة وحلوة

كنت وانا بشتغل بحلم انى لما اتخرج هقف فى معمل وأصنع دواء

أو أقف فى صيدلية أتحاور مع المرضى وأساعدهم فى العلاج

وقد كان والحمد لله وتحقق حلمى

وأنا واقفة فى الصيدلية بحس انى فى مملكتى

ثقة الناس فى الصيدلى مهمة جدا

والصيدلى مش واقف فى سوبر ماركت وبيبيع

الصيدلى حلف قسم انه يساعد فى علاج الناس

ودراسة الصيدلى تؤهله تماما فى مشاركة الطبيب فى وصف العلاج

ولكن بحكم العرف الوظيفى فى مصر والذى لا يعترف بفريق العمل

دائما ما تجد اتهامات متبادلة بين الطبيب والصيدلى

نحن لسنا مجرد بائعى أدوية

وانما أمناء على أغلى ما يملك الانسان : الصحة

وأتشرف بكونى أحدهم

وأتمنى أن يوفقنى الله وزملائى فى مساعدة الناس

وأن نكون أكفاء لحمل هذه الأمانة

يمكن يكون دمى تقيل أوى فى البوست ده

بس أنا بصراحة متحيزة جدا لمهنتى وبحبها

وأحب دايما ان الجميع يفهم نبل الرسالة اللى بيقوم بيها الصيدلى