كان لازم أقول

تاج الفضايح .. تاج الفضايح .. الحق اقرا التاج

صديقتى ابيتاف كانت مررت لى من فترة تاج الفضايح

اكتب خمس حاجات مفيش حد يعرفهم عنك

أنا مش عارفة هكتب خمسة أو أكتر أو أقل

أنا هكتب اللى فى بالى وخلاص

أولا : بحب بالليل أقعد لوحدى وأمسك ورقة وقلم وأكتب كل اللى بحلم بيه

ساعات بقعد أضحك وأنا بكتب

وساعات دموعى بتبهدل الورق

ثانيا : لما بحب بقى .. بتنيل على عينى وبحب على الآخر

بس لما بتضايق من حد بتنيل على عينى برضه وببقى رخمة موت

ثالثا : أوقات لما بكون متضايقة بتخيل انى بقيت نجمة مشهورة فى أى مجال

لأ وايه بقى أشوف كأن الناس بتصفق لى كتير وأنا بشاور لهم من فوق المسرح

ده الواحد مخه لاسع والله

رابعا : بحس بكمية تفاؤل ممكن تغرق العالم لما أفتح اذاعة القرآن الكريم فى أى وقت وألاقى شغال عليها سورة الأنفال

خامسا : فيه أرتام معينة للأغنيات لما بسمعها بلاقى عنيا بتدمع مش عارفة ليه

سادسا : وأنا صغيرة وكان عندى 3 سنين اتشعبطت على سور البلكونة ونمت على احبال الغسيل

وماما ربنا يخليهالى هى اللى أنقذتنى

أصل أنا من صغرى لما تلاقينى اختفيت كده يبقى أكيد بعمل مصيبة سودة

ولحد دلوقتى برضه أنا كده

سابعا : وأنا عندى 7 سنين بابا كان اشترى لى أنا وأختى كل واحدة فينا ساعة والاتنين كانوا شكل بعض بالضبط

وكنا عند عمتى وأنا بلبس ساعتى وقعت اتكسرت

وأنا بقى مكنتش بحب ابن عمتى

قمت لبست ساعة أختى وحطيت ساعتى مكانها

ولبست ابن عمتى الليلة كلها وأنا واقفة بمنتهى البراءة

يالهوى أصله كان غلس أوى

ثامنا : كفاية بقى عليكوا كده لأنى لو كملت هتبقى الفضايح على كل لسان

وربنا حليم ستار يا ولاد