voice of love

Saturday, April 28, 2007

يوميات صيدلانية طالع عينها

ساعات كده الواحد بيحس انه اتدبس

آه والله

والتعامل مع الجمهور بقى أكبر تدبيسة فيكى يا دنيا

أنا بقى لما اتخرجت افتكرت ان الناس هتفرش لى الأرض ورد .. ما أنا الدكتورة

وقفت فى الصيدلية وشفت الهنا المستعجل

تخيل مثلا ممكن حد يتعب نفسه ويهز طوله ويدخل عليك الصيدلية .. ليه ؟؟

علشان يسألنى الساعة كام ؟

وطبعا أول ما بيدخل نروح هاجمين عليه علشان نخطف منه الروشتة المزعومة

ونلاقيه فى الآخر بيسأل عن الساعة

بالذمة والنبى مش حاجة تغيظ ؟؟

أو بنت صغيرة تدخل تقولك

ماما بتسلم عليكى وبتقولك عايزة ازازة الدوا اللى لونها من جوه أخضر

وابدأ انت بقى التنجيم أو اضرب الودع أو افتح المندل

زى ما انت عايز

ويا سلام بقى لما حد يدخلك بروشتة ويطلب منك معرفة الأسعار

تقوله مثلا 50 جنيه

تلاقيه يرفع حواجبه لحد ما توصل جنب كوكب المريخ

ويفتح بقه لحد ما تدخل فيه عربية نقل

ويقولك : الدوا عندكم غالى كده ليه

قال يعنى أنا اللى جايبة التسعيرة من بيت أبويا

ولو حد دخل عليا بيسألنى على حاجة

ألاقى مثلا ان الموضوع أكبر من انى أتكلم فيه

أقترح عليه انه يروح لدكتور تخصص معين

ساعتها بقى أطلع أنا الدكتورة الفاشلة اللى عمره ما هيدخلها صيدلية

مع انى كان ممكن أفتى له وأضيعه

بس من باب الأمانة بعمل الصح اللى بيزعل دايما

ومن مبادىء الصيدلة فى هذا الزمان العجيب ان الواحد لازم يكون عارف الآتى

السريع : المقصود بيه أقراص أوبلونج نوفالجين اللى اتلغت فى الدنيا بحالها ما عدا بلدنا

الفرورست : يعنى أقراص الفلورست

ال 75 : أقراص أنافرانيل 75

الأرطة : المقصود أقراص المغص

وخد من ده كتير بقى

ولو كان فيه باقى لزبون مثلا بيبقى عايز بالباقى كبريت

يا صلاة الزين

ده الواحد كره العيشة واللى عايشينها واللى هييجوا يعيشوها بعد كده

أقول حاجة فى الآخر والنبى

حسبى الله ونعم الوكيل

وصبرنا يارب

11 Comments:

  • At Sun Apr 29, 07:17:00 PM 2007 , Blogger Gid-Do - جدو said...

    داليا

    بصى للعبارة دية ـ انا بقى لما اتخرجت
    افتكرت ان الناس هتفرش لى الارض ورد ـ
    *****
    وانا ياداليا شعرت بنفس الزهو دة لما بقيت طبيب لكن لية عاوزين الناس تفرش الارض لينا ورد؟
    *****
    احنا كل اللى عملناة كان لنفسنا مضفناش اى حاجة للناس ـ الواد بلية صبى الميكانيكى اللى فى شارعنا وعم عبدة بتاع التلج ولا الست الغلبانة بتاعة الفجل اللى كانت بتقعد بالمشنة على الرصيف فضلوا غلابة زى ماهما لما دخلت الكلية وبعد ما تخرجت منها كبروا فى السن فقط وبقوا يقولولى يادكتور ويقفوا على حيلهم لما اعدى عليهم والقى السلام واعتقد انهم بكدة فرشوا الارض ورد بالنسبة ليا رغم انهم غير مطالبين بهذا على الاطلاق وكتر الف خيرهم
    *****
    داليا

    احنا شعب غلبان وطيب علشان كدة كل الامثلة اللى انت كتبتيها سببها الفقر اللى داخل يسالك الساعة كام لانة مش قادر يشترى ساعة رغم ان الساعات الرقمية اصبح تمنها رخيص جدا ـ اتنين دولار الساعة ـ يعنى عشرة اتناشر جنية ـ او ممكن يكون عاطل وبيتسكع يمكن يلاقى شغلانة ويكون السؤال عن الساعة بداية كسر الجليد فبل ما يسال معندكمش اى شغلانة اكل منها عيش
    *****
    الام اللى عاوزة دواء لابنها فى ازازة خضرة ـ الام دية عمرها ما تعلمت جوزوها اهلها علشان يخلصوا منها لواحد زيها مش متعلم وفقير عايشين فى قمة الفقر ورغم هذا بيخلفوا عيال ودة حقهم لكن بدل عيل واحد بيخلفوا نص دستة وبيزودا فقرهم وفقر عيالهم
    *****
    الخمسين جنية ـ مبلغ ضخم بالنسبة لواحد غلبان يشترى بيهم دواء ولا يشترى بيهم اكل ولا هدمة طبعا لازم يصدم

    *****
    ينسب قولا لسيدنا على بن ابى طالب يقول فية ـ لو كان الفقر رجلا لقتلته ـ ودة اللى المفرض يتعمل القضاء على الفقر غير كدة حيفضل الوضع على ما هو علية بل سوف يزداد سوء

     
  • At Sun Apr 29, 09:00:00 PM 2007 , Blogger الوردة السوداء said...

    ههههههههههههه
    بجد ضحكتينى

    معلش يابنتى البلد مبقتش محتاجة صيادلة

    بقت محتاجة صيع

    على راى عمك عادل امام
    الله يمسيه بالخير

     
  • At Sun Apr 29, 09:08:00 PM 2007 , Blogger on_line_any_time said...

    د/ داليا الفقر و الجهل و الفساد اللى وصلنا اليه يعمل اكتر من كده .انا بشتغل فى مهنة ليها احتكاك بالناس برضه و انا لسه خريج جديد مافيش من اربع سنين مهنتى ليها احتكاك بالناس و احدى المصالح الحكومية لو قلت لواحد هات 50 جنيه مستحقة عليك للمصلحة اياها برضه يرفع حواجبه و يفتح بقه و مايدفعش بس يروح لواحد تانى يقوله هات نفس ال50 جنيه رشوة يقوم دافع على طول
    و زى مانتى قولتى : حسبى الله و نعم الوكيل فى اللى وصلنا لكده

     
  • At Mon Apr 30, 07:42:00 AM 2007 , Blogger كلام لوجيك said...

    موضوعك ممتع جدا عشان عدة حاجات
    اسلوبك الجميل فى الكتابة
    وكتابتك لقصص حقيقية من واقع الحياة اليومية والاحتكاك بالناس
    ولإستفادتنا وتعلمنا بعض المصطلحات الطبية الجديدة فى عالم الصيدلة من خلال كلمات مرضاكى الزائرين

    وضحكت جدا لما كتبتى التشبيه الجميل قوي ده
    تلاقيه يرفع حواجبه لحد ما توصل جنب كوكب المريخ

    ويفتح بقه لحد ما تدخل فيه عربية نقل

    وطبعا انا متفق مع كلام الاخوة اللى سبقونى فى التعليقات فى كل اللى قالوه
    شعبنا للاسف الشديد مقيد بالفقر والجهل وانتشار ثقافات جديدة خاصة بالطبقات الدنيا
    حيث اصبح لهم كلماتهم الخاصة وتعبيراتهم المميزة لهم واسلوب تعامل غريب

    انا عاوز أقولك امك ياما هتواجهى مواقف ومفاجآت وطرائف طوال فترة عملك فى هذا المجال ولكثرة الاحتكاك بالناس على مختلف أطيافهم وتعدد ثقافاتهم
    اتمنى لكى كل التوفيق والنجاح فى عملك ومهنتك وحياتك

    دمتى بكل خير

     
  • At Mon Apr 30, 01:02:00 PM 2007 , Blogger wa3d-el3yoon said...

    يا عينى عليك يا كيبه لما بتضيعى منا لما تروحى الصيدليه وتلاقى الناس دهيه
    وفى عز الحر ده تلاقى ماتلاقيش غير الخنقه

    معلش استحملى بقى

     
  • At Mon Apr 30, 01:38:00 PM 2007 , Blogger Ma-3lina said...

    ههههههههه

    فكرتينى بنفسى لا مش بنفسى بس بكل الصيادلة ايه حكاية الارطة دى اول مرة اعرفها

    اقول ايه بس ماا عليناا

     
  • At Mon Apr 30, 02:54:00 PM 2007 , Blogger Ayyam said...

    داليا كلام جدو فى السليم كالعاده ..لكن عايز أضيف جزء :لو عايزه زباين ميه ميه يبقى لازم تفتحى صيدليه فى مكان سياحى فاخر زى الغردقه أو الشرم...تصدقى مره رحت صيدليه هناك وسألت الدكتوره أنها تدينى العلاج اللى فى الروشته...كانت حلوه جداً ولأنى قلبى روهيف نسيت أنى عيان وسألتها أذا كان لون عيناها فعلاً أخضر ولا دا بسبب العوم فى البحر كتير...ومن سعتها بقينا صحاب.

     
  • At Mon Apr 30, 09:46:00 PM 2007 , Blogger Nouran said...

    احنا اكيد لما نتخرج ده لو اتخرجت اصلا هيفرشوا الارض رمل وزلط ههههه
    بس ايه ده كانت الحاجة الوحيدة اللي مضايقاني لو كنت هخش صيدله اني هقف ابيع ادويه ههههه بس طلع عندي حق ولا ايه يا بنتي ربنا يصبركوا يا رب الواحد عايز حاجة ف السريع ولا ايه يا دكتور

     
  • At Tue May 01, 11:54:00 PM 2007 , Blogger voice of love said...

    جدو
    رغم انك حضرتك مغمقها شوية الا ان الحكاية مش زهو ولا حاجة
    انا اتعلمت كويس ودخلت الكلية وحلفت القسم انى أساعد بتاعة الفجل واللى زيها .. يعنى حضرتك أخدت الموضوع قفش مش عارفة ليه
    ومع احترامى لوجهة نظرك أنا أضفت لنفسى لا أنكر بس بالتأكيد أضفت للناس ودى حاجة أنا اللى أحسها لما بلاقى نظرة عرفان من مريض ربنا جعلنى سبب فى شفائه
    وعلى فكرة حضرتك بتتكلم على التعليم والفقر مع ان الجهل عمر ما كان له علاقة بالذكاء والفطانة واعتقد اكبر دليا هو عباس العقاد الأديب الكبير حامل الابتدائية
    السبب مش الفقر العيب فينا احنا

    الوردة السوداء
    لو كنت عرفت الكلام ده من زمان كنت بقيت حاجة تانية
    هههههههههههه

    اونلاين
    نورتنى وميرسى لوجودك
    ادينا فى الهوا سوا

    كلام لوجيك
    نورت يا فنان
    ميرسى لتعليقك الرقيق

    وعد العيون
    يا هلا
    اعمل ايه مقدر ومكتوب

    ماعلينا
    سعادة الدكتورة يا مرحبا
    يلا معلومة ببلاش
    اى خدمة

    أيام
    يا عم احنا ناس على قدنا
    لا مكان سياحى ولا بتاع
    ماشى يا بتاع اللون الأخضر
    الله يسهله يا عم

    نوران
    الباشمهندسة الصغننونة
    انا بقى كتبت لك بوست كامل أرد فيه عليكى
    انا مش ببيع أدوية
    احنا كصيادلة بنساعد الناس انهم يكونوا فى صحة أفضل
    ذاكرى كويس
    الامتحانات خلاص قربت
    وان شاء الله ناجحة وهبارك لك

     
  • At Mon Jun 11, 07:34:00 PM 2007 , Blogger مجدى الجبالى said...

    واضح يا دكتورة إن إسمك داليا من التعليقات السابقة

    المهم أخوكى كان دكتور صيدلى زيك بس خريج تجارة إنجليزى(طبعا إنت فاهمه إذاى)لذا هسحب كلمة زيك
    طب إنتى درستى فى الكلية و ده بيساعدك شوية أمال انا أعمل إية فى الزباين بتوعى لما واحد يقولى عايز أقراص فحم ب 2.5 جنية و هو عايز
    eucarbon
    و غيره عايز بورشامة الضغط إللى خاتتها منكم من خمستاشر يوم
    و غيره باعتينه بورقة فيها موبيتيل بتاع المفاصل
    يطلع عايز كارت موبينيل من الصيدلية برده والفظيعة بقى النكتة اللى جايه الصبح الساعة 8 جالى عيل متأخر عقليا مبعوت بورقة فيها تلات كلمات مكتوبين بخط يقرف الكلب
    (إقراص ؟؟؟؟؟ ؟؟؟؟)
    ساعة أنا و الكاشير و عامل التوصيل نحاول حل اللغز و فى الاخر يطلع عايز
    (إقرار ذمة مالية)
    من البوسطة اللى جنبنا

     
  • At Mon Feb 16, 01:51:00 PM 2009 , Blogger will said...

    A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

    a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

    情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品

    A片,A片,A片下載,做愛,成人電影,.18成人,日本A片,情色小說,情色電影,成人影城,自拍,情色論壇,成人論壇,情色貼圖,情色,免費A片,成人,成人網站,成人圖片,AV女優,成人光碟,色情,色情影片,免費A片下載,SEX,AV,色情網站,本土自拍,性愛,成人影片,情色文學,成人文章,成人圖片區,成人貼圖

    情色,AV女優,UT聊天室,聊天室,A片,視訊聊天室

    一夜情聊天室,一夜情,情色聊天室,情色,美女交友,交友,AIO交友愛情館,AIO,成人交友,愛情公寓,做愛影片,做愛,性愛,微風成人區,微風成人,嘟嘟成人網,成人影片,成人,成人貼圖,18成人,成人圖片區,成人圖片,成人影城,成人小說,成人文章,成人網站,成人論壇,情色貼圖,色情貼圖,色情A片,A片,色情小說,情色小說,情色文學,寄情築園小遊戲, 情色A片,色情影片,AV女優,AV,A漫,免費A片,A片下載

     

Post a Comment

Subscribe to Post Comments [Atom]

Links to this post:

Create a Link

<< Home