حاجة غريبة
افلاس فكرى غريب
القريحة مش شغالة خالص
مفيش حتى فكرة نفسها تتكون فى دماغى
هروب جماعى للأحاسيس والأفكار
ومع ذلك طالع فى نافوخى انى لازم أكتب
ومش عارفة أكتب ايه
والنبى يا جدعان
لو دى حالة عامة طمنونى
ولو وباء انتشر وتمت مقاومته بلغونى
بس سيبكم من ده كله
تخيلوا اننا فى منتصف شهر رمضان
يعنى كمان أسبوعين ورمضان هيسيبنا ويمشى
أنا مش فاهمة مستعجل ليه ؟ وراه ايه يعنى ؟
أصلى أنا بموت فى شهر رمضان ده يا ولاد
سيبكم من ده كمان
مع انى بحب شهر رمضان وكل حاجة
بس مشكلته الوحيدة ان فترة شغلى فى الصيدلية بيتقصف عمرها
علشان ألحق الفطار فى البيت
وبالتالى المرتب كمان بينضرب بالنار وبيتقصف عمره
بس أحلى حاجة ان الناس فى رمضان بتحاول تبقى مؤدبة
الا انهم مش بيقدروا يبطلوا كذب
داء بعيد عنكم
بس الدنيا زحمة أوى اليومين دول
ولا هىّ على طول زحمة وأنا اللى بنسى
اسكتوا
مش أنا نسيت مفاتيح الصيدلية جواها من كام يوم
وقفلت ومشيت بالنسخة اللى معايا
وسبت الأصل جوه الصيدلية
الشهادة لله
صاحب الصيدلية كان مبسوط منى جدا
والحق يقال
هوه مستحملنى وشايف منى كتير
بس لذيذ وبيسمع كلامى
علشان كده فيه بيننا لغة حوار
بس أغلس حاجة بقى ان موبايلى اتسرق
والله يا بشر كنت بحبه أوى
أصلى جايباه من 6 شهور بس
واتسرق من شهر
على رأى واحدة صاحبتى
ان شالله ما يوعى يتهنى بيه
ايه كل الرغى ده ؟؟
كفاية عليكم كده .. باى باى بقى
اللهم بلغنا رمضان
posted by voice of love @ 9/25/2007
13 Comments:
At Sat Sep 29, 09:45:00 PM 2007 ,
غمض عينيك said...
هي حالة عامة فعلا
كسل تدويني وافلاس فكري
رمضان بقا حيث الفطار الدسم والحلويات والتراويح والذي منه
كل سنة وانتي طيبة
At Sun Sep 30, 01:41:00 AM 2007 ,
الأميره أوسه said...
أنا أحيانآ بقعد بالشهور مش لاقيه كلمه أكتبها
حالات الفلس دى مش بس فى التدوين
حتى فى الحياه
وأحيانآ الأفكار بتيجى وأنا بتابع التدوينات الجديده
وأحيانآ وأنا فى التواليت
عادتشى يعنى
على فكره أنا مسروق منى موبيل قبل كده
حاسه بيكى
واااااااااااء
At Tue Oct 02, 12:18:00 AM 2007 ,
Muhammad Mammdouh said...
دى الناس من كتر التفكير مش قادرة تفكر هى تكتب اية ولا اية عموما كل سنة وانت طيبة
ورمضان كريم .............
والله الواحد عايز يشوف لرمضان وسطة يخلية يقعد معانا شوي بس هانعمل اية بقى ....
At Wed Oct 03, 11:30:00 PM 2007 ,
Nouran said...
لا طبيعي وعادي 100 ف ال100
مفيش اي مشكلة
بس ما هو بوست حلو اهوه يعني
خلاص رمضان قرب يخلص يا رب بلغنا ليله القدر يا رب :)
هيوحشنا رمضان ده والله
كل سنة وانت طيبة :)
At Thu Oct 04, 10:53:00 PM 2007 ,
عابر سبيل said...
امنى لكى ان ينتهى هذا الفراغ الفكرى وامنالك ان تبدعى فى مواضيع جديدة
At Fri Oct 05, 08:20:00 PM 2007 ,
islam said...
صوت الحب
هى حالة عامة فعلا
أنا كاتب تعليقات مهمة عند ناس بقالى مدة
وكل ما أدخل عشان أتابع حتى الرد على التعليقات
ألاقيهم فى صمت مخيم
حتى التعليقاتيا ناس
ده طبعا إضافة لتوقف الكتابات
عامة
كل سنة وإنتى طيبة ولو كانت متأخرة
بس ميضرش
السلام عليكم
At Fri Oct 05, 10:15:00 PM 2007 ,
Rosa said...
اعتقد انها حاله عامه فعلا
لا تقلقلي
و يا ستي ارغي زي مانتي عايزه عن نفسي بحب اسمع كلامك قوييييييي
و ركزي بقا و ماتنسيش المفاتيح و ربنا يعوض عليكي الموابيل معلش يا جميل بقى
:)
كل سنه وانتي دايما طيبه
At Sat Oct 06, 02:36:00 AM 2007 ,
admelmasry said...
اولا احب اطمنك ام الحالة عامة ومش دايمة ياعني
.
.
.
والدليل انك خفيتي في اخر البوست
.
.
ازاي ؟
اه انت اتكلتي في غشرين اربعين موضوع مع بعض مرة واحده
.
.
ازاي ؟
اه اقولك
.
.
.
رمضان هيخلض
ــــــــــ
شغلك اللي في الصيدلية
ــــــــــــــــــ
مشكلة المرتب
ـــــــــــــ
شكل الناس في رمضان
ــــــــــــــــــ
الدنيا زحمة اليومين دول
ـــــــــــــــــــــــ
نسيتي مفاتيح الصيدلية
ــــــــــــــــــــ
صاحب الصيديلة الكويس
ـــــــــــــــــــ
موبايلك اتسرف
ــــــــــــ
.
.
.
انا عايز اعرف لو كنتي بقي عارفه تكتبي وماعندكيش حالة افتقار فكري
كنتي عملتي ايه فينا
.
.
انا بانصح انك تعملي كل موضوع من دول في بوست منقصل
.
.
تحياتي والسلام
At Sat Oct 06, 01:18:00 PM 2007 ,
Tamer Nabil Moussa said...
الواحد بيجى علية فترة وبيحس انة مش عارف يعمل اى حاجة
بس هيا فترة وبتعدى
عارفة غيرى جو روحى مكان بتحبية
هتحسى بالتغير وهتودى كلك نشاط
ربنا يكرمك
تحياتى
At Sat Oct 06, 07:08:00 PM 2007 ,
nour el 3ozamaa said...
ادعوك لزيارة مدونتي والاطلاع علي قصيدة مبارك يا من ذا الذي في مصر الجديده
شكراا
At Wed Oct 10, 02:13:00 PM 2007 ,
l0ma said...
عادى على فكرة وبتحصل فى احسن العائلات
ورمضان خلاص للاسف خلص وكل سنة وانتوا طيبين
At Thu Oct 11, 09:18:00 PM 2007 ,
gamal said...
عيـــــــد مبـــارك
كل عام وأنتم جميعًا بخير بمناسبة قدوم عيد الفطر المبارك
أسأل الله العلى القدير لى ولكم ولكل المسلمين والمسلمات السعادة في الدنيا والآخرة
كما أسأله سبحانه وتعــالى أن يتقبل طاعتنا في رمضان ، وأن يثبتنا عليها بعد رمضــان
،تقبل الله منا ومنكم صالح الأعمــال
اللهم أمـيــن
At Fri Oct 12, 08:35:00 AM 2007 ,
Anonymous said...
اول مره ليا في مدونتك الرقيقه دي فأسمحيلي اني اقولك كل سنه و انتي طيبه و كل اللي بيحتفلوا بالعيد عيد مبارك انشاء الله
صدقيني حاله عامه انا برضه بحس ان ساعات مفيش و لا فكره راضيه تيجي علي بالي و ساعات تانيه ماشاءالله تلاقي الأفكار جايه كلها ورا بعضها مابقاش عارفه الاحق عليهم
اسفه علي الموبيل اللي ضاع و زي ماقالولك مايوعاش اللي اخده انه يتهني بيه ربنا يعوض صبرك خير عزيزتي
تحياتي لكي و اكيد مش حتكون اخر مره ازورك
كل سنه و انتي طيبه
Post a Comment
Subscribe to Post Comments [Atom]
<< Home