أحكى لمين .. وأشكى لمين
كان يا ما كان
فى سالف العصر والأوان
واحدة من عجايب الدنيا السبعة
اسمها الأهرامات
ولما بعيد عنكم واحد سويسرى اتلطش فى نافوخه
قال نختار سبع عجايب جداد
قامت الدنيا كلها سمعت كلامه مش عارفه ليه
واحنا طبعا كالعادة نايمين على وداننا
تم الاستفتاء والتصويت عبر الانترنت
واختار المحكمين عجايب سبعة ومش فيهم الأهرامات
رغم انها العجيبة الوحيدة الباقية من السبعة الأصلية
وعلشان كده محدش اختارها
لأ وايه بقى
اختاروا آثار ماشوبيشو وهى آثار قبيلة الأنكا فى بيرو
يا صلاة الزين
ماشوبيشو .. والنبى ده اسم يقابلوا بيه وجه كريم
يعنى احنا عندنا 3 أهرامات طول بعرض يسدوا عين الشمس
وواقفين على حيلهم من أكتر من 7 آلاف سنة
ومعبد أبوسمبل .. أكبر معبد صخرى فى العالم
وبتتعامد فيه الشمس على وجه رمسيس مرتين فى السنة
والناس بتجيلهم من كل الدنيا
لأ يسيبوهم ويختاروا ماشوبيشو
والمسئولين بتوعنا بقى جزاهم الله كل خير
لم يحركوا ساكنا
وسلملى على بارنيطة زاهى حواس
posted by voice of love @ 7/13/2007
12 Comments:
At Fri Jul 13, 11:48:00 PM 2007 ,
Dalia said...
هيييييييييييه انا اول كومنت
بصى يا دودى انا سمعت من عمرو اديب ان الراجل السويسرى ده كان عاوز يعمل الحفله فى الاهرامات و الحكومه ماوافقتش ...مش عارفه هنفضل كده لحد امتى
انا بجد متضايقه اوى عشان الموضوع ده بس بيقولو ان الاهرامات ارقى من انها تتحط مع العجائب الجديده
حاجه تغييييييييييييظ
At Sat Jul 14, 02:16:00 AM 2007 ,
Rosa said...
سلام مربع ومستطيل كمان
ماهو هقلك على مثل ظريف لسه سعاه قريب
بيقولوا فيه
الي جوزها يقلها يا عوره الناس تلعب بيها الكوره
وكل لبيب بالاشارة يفهم
هنقول ايع ماهو بقا دا الغادي و الطبيعي بتاعنا
وحشاني :)
At Sat Jul 14, 10:55:00 AM 2007 ,
Ayyam said...
العزيزه داليا، نتيجه الأقتراع لاتعنى أن العالم لايقدر الأهرامات أو غيرها.. الحكايه أن الهند والصين ودول أمريكا اللاتنيه تعداد سكانهم كبير ويقدرو يصوتوا بنسبه أعلى....مثلاً تمثال الحريه فى نيويورك أحسن بمليون مره من تمثال السيد المسيح فى ريو دى جانيرو..لكن علشان البرازيليين عددهم كبير، فاز تمثالهم عن تمثال الحريه...ماتشو بيتشو بصراحه تستاهل تكون من عجائب الدنيا السبع زى برضو سور الصين العظيم...
طبعاً لوكان الأقتراع بشروط وفقط من ناس متخصصه..بكل تأكيد الهرم يكون الاول بلا منازع...المهم ماتزعليش بكره يطلع واحد معزه تانى ويقول تعالوا نختار عجائب الدنيا مره تانيه
At Sat Jul 14, 05:45:00 PM 2007 ,
Nouran said...
اه يا بنتي صحيح حاجة تغيظ قال ايه بقى اسمها عجيبة شرفية علشان هي الوحيدة المتبقية طب محتوهاش ليه معاهم انا معرفشي ؟؟
At Sat Jul 14, 11:52:00 PM 2007 ,
media said...
اولا ازيك يا داليا
انا سمعت الخبر دة قبل كدة ويظهر كدةعلى راي المثل الي بيقول القوالب نامت واللنصاص قامت
At Sun Jul 15, 02:54:00 PM 2007 ,
أسوور said...
المسابقة قد بدأت في العام 1999 بعد أن أطلقها المغامر السويسري بيرنارد ويبر
وتم ترشيح نحو 200 موقع، ليتم اختزالها لاحقاً إلى 21 موقع
بدأ التصويت على اختيار سبعة منها في العام 2006
ولم نتحمس نحن والتصويت كان مفتوح على النت ولم نذهب لنصوت للأهرامات
هى دى كل الحكاية
At Mon Jul 16, 09:34:00 AM 2007 ,
Mirage said...
لأ بس الموصوع اصله تجارى بحت يعنى
مالوش اى اعتبارات تاريخية او اثرية
دى اى كلام فى الهجايص
متنسيش ان اشكى لمين دى بتاعت منير فى الأصل ولو ان انغام اداءها تحفة برضه
بس الكبير كبير يامحمد يامنير
At Thu Jul 19, 09:22:00 AM 2007 ,
و القادم....أجمل said...
السلام عليكم
أساسا المسابقة دي سمعت انها
غير رسمية و منظمة اليونسكو
مش معترفه بيها
هيا بس الفكرة انها كانت
هتبأه دعاية حلوة للسياحة
بس الاهرامات كانت و لا زالت
من عجائب الدنيا
:)
تقديري
At Thu Jul 19, 08:51:00 PM 2007 ,
ody911 said...
هههههههههههههه
داليا
متزعليش يا بنتى
أحنا عملنا إللى علينا والباقى على ربنا
هههههههههههههههه
قال زاهى قال
بلا نيله
At Sat Jul 21, 10:03:00 PM 2007 ,
سهر الليالى said...
التصويت كان مفتوح للجميع ونحن اصحاب الاهرامات لم نتحمس لها ولم نغار عليها ولم نهتم بها هل كان من المنتظر ان يرشحها غيرنا ؟ صعب يا داليا والعيب فينا احنا بس دايما نلوم الغير ودى مشكلتنا فعلا..تحياتى ليكى لاثاره الموضوع
At Sun Jul 22, 04:32:00 PM 2007 ,
yasmina said...
فعلا حاجة تقهر
والسبب احنا اللي ساكتين عن الحق
سلام
At Tue Jul 24, 01:54:00 PM 2007 ,
voice of love said...
أشكركم جميعا وأعتذر للتأخير فى الرد
تحياتى للجميع
Post a Comment
Subscribe to Post Comments [Atom]
<< Home