voice of love

Sunday, July 08, 2007

أتمنى له الخير

من فترة عايزة أكتب البوست ده

بس مش كنت عارفة أكتب ايه

وأعبر ازاى عن حالة المرارة اللى حسيتها

انا بكتب رسالة لصديقة

أتمنى انها تكون لسه بتابع مدونتى زى ما بتابع مدونتها

عايزة أقولها انتى فين ؟؟

ليه بسأل عنك ومش بتسألى عنى ؟؟

من امتى واحنا بعيد عن بعض كده ؟؟

من امتى حد فينا بيتعب ومش بيلاقى التانى جنبه ؟؟

طيب انتى وحشتينى

يا ترى أنا كمان وحشتك ؟؟

يا ترى بتفكرى فيا ؟؟

يا ترى مقلقتيش عليا ؟؟

يا ترى فيه سبب للفجوة اللى حصلت بيننا دى ؟؟
طيب لو كنت غلطت فى حقك
مش كان المفروض تعاتبينى
ولا على طول كده تعاقبينى
وعموما اذا كان الغلط منى سامحينى
بس هوه فين الغلط ؟؟
مستنياكى تبعتيلى الرسالة اللى أنا بحبها
وتقوليلى : وحشتينى يا بنوتة
فاكرة الرسالة اللى بعتهالك وقلت لك
يا ساكنا قلبى كفاك غيابا
ألا ترى بفضا العيون عتابا

فاكرة آخر مرة لما اتصلت بيكى يوم 3/6 عيد ميلادك ؟؟

الخط قطع وقلتيلى هاكلمك بعد ساعة

تخيلى ان الساعة دى بقى لها شهر و5 أيام

عارفة فيلم فؤاد المهندس وشويكار

لما نزلت تجيب طابع بوستة واختفت 15 سنة

يا ترى انتى بقى هتكلمينى بعد 15 سنة ؟؟
بقى عندى احساس انى بتطفل على حياتك
والاحساس ده بيجرحنى ويدبحنى
مكان فى قلبى زى ما هوه
شقة أربع حجرات وصالة وعفشة مياه
مستنياكى تنوريها تانى

بس هاقولك ايه يا كنز حياتى

على رأى أنغام

هاتمنى له الخير

ايه يعنى يفوتنى وينسانى

ما هو ياما اتحمل علشانى

ما هو ياما كان قلبه عليا

هاتمنى له الخير

ما هو قبل ما يجرحنى داوانى

كان عمرى وكان كل زمانى

كان قلبى وروحى وعنيا

21 Comments:

  • At Mon Jul 09, 12:58:00 AM 2007 , Blogger صاحب البوابــة said...

    كلماتك رقيقة

    ومشاعرك رائعة

    تحياتي لكِ ولصديقتك

    واتمنى ان تقرأ هذا البوست لتعلم مدى حبك لها

     
  • At Mon Jul 09, 01:02:00 AM 2007 , Blogger Gid-Do - جدو said...

    داليا

    رغم ان البوست دة رسالة شخصية موجهة الى شخص محدد والرد علية يعتبر تدخل فى علاقات شخصية ـ وكان ممكن تقفلى باب التعليق كمان ـ لكن كونك تركتى الباب مفتوح للتعليق فقد اصبحت الرسالة شخصية المضمون عامة الموضوع

    صديق اسمه الانصارى ـ اطال الله فى عمرة ومتعة بالصحه ـ اعرفة منذ اكتر من ربع قرن لكن فى الخمس عشر سنة الاخيرة ـ نظرا لوجودة فى ولاية بعيدة عنى ـ لم نرى بعضنا وجها لوجه سوى مرات تعد على اصابع كف اليد الواحدة ـ ورغم هذا لم تنقطع مكلامات التليفون بيننا واطول مدة زمنية بين المكالمات لاتزيد عن شهر اما زمن المكالمة االواحدة فلا يقل عن الساعة

    في حين ان اصدقاء كثيرين ضاعوا فى زحام الحياة والسبب اننى كنت اتصل بهم اكثر من مرة واعاتبهم على عدم الرد فيكون الرد الاكلاشيه جاهز ـ انا مشغول ـ وكنت اسال نفسى ـ ماانا برضة مشغول زيهم لكن بلاقى الوقت انى اسال عليهم

    وكان الانصارى يعانى من نفس المشكلة وفى احدى المرات قال لى الانصارى بلا وجع قلب اللى يسال علينا نسال علية ولا يطنش مع الف سلامة

    لى صديق اخر اعرفة منذ زمن معرفتى بالانصارى وعلى الرغم من انه لايتصل بانتظام الا انه دائم الاتصال بى خاصة فى المناسبات الكبرى ـ رمضان او العيد ـ لم يتخلف ابدا طوال الربع قرن واعتز به كما اعتز بالانصارى لانه عمرة ما نسى الاصدقاء

    يقول ابن عروس

    من حبنا حبناه
    وصار متعنا متاعه
    ومن كرهنا كرهناه
    يحرم علينا اجتماعه

    الامر متروك ليكى اما تعملى بنصيحة الانصارى او تفضلى تكلى فى نفسك

     
  • At Mon Jul 09, 01:25:00 AM 2007 , Blogger voice of love said...

    صاحب البوابة

    أنا كمان نفسى تقراه يمكن أقدر أهز الجمود المفاجىء فى مشاعرها
    شكرا لمرورك الكريم


    جدو
    انت عارفنى
    لما بحب حد بتنيل خالص وبحبه من كل قلبى
    وهى صاحبتى جدا
    وأنا باقية عليها ومش عايزة أخسرها
    نفسى بس تقرا الكلام ده
    يمكن يفوقها ويحسسها انها مقصرة قد ايه
    تحياتى يا جدو العزيز

     
  • At Mon Jul 09, 04:54:00 AM 2007 , Blogger raghda safwat said...

    ايه ده كله ايه ده كله
    تعرفي ان معرفتي بيكي الشخصية شجعتني كتير على متابعتك
    انتى انسانة جميلة اوى و انا مقدرة جمالك الشخصي ده و حاسة بكلامك
    انا في حياتي اكتر من صديقة عاوزة اقولها نفس اللي انتي قولتيه
    قلبي عندك بجد
    اصبري
    هيجيي لها يوم تحس
    اكيد يوم هتتزنق و مش هتفتكر غيرك و هتلاقيها بتسأل
    و لو مسألتش
    اتمنى لها الخير
    الاغنية دي عظيمة اوى اوى
    بس بجد بلوجك جميل و رقيق زيك بالضبط
    اتكلمى اكتر
    اتمنى اشوفك ع المسنجر يا بنت
    ابوسك
    دي طريقة نبيلة عبيد على فكرة
    لما بتبقى بعيد عن حد و يقولها كلمة حلوة تقوله
    أبوسك
    مرة سميرة قالتها لي و رمت لي بوسة في الهوا
    الله يرحم
    هههههههههههه
    بس عجبني مثال طابع البوستة

     
  • At Mon Jul 09, 12:26:00 PM 2007 , Blogger Bossy said...

    السلام عليكم

    بجد انت حد حلو اووي
    شوفي بقيه عليها قد ايه
    لانك اكيد فاهمه ان الصداقه مش شئ بسيط ومش سهل تلاقي
    صديقه بجد
    اتمني انكوا ترجعوا اكتر من اصحاب
    بس مين هي
    انا بجد اتمنيت اكون مكانها علشان يكتب فيا الكلام الحلو دا
    وان شاء الله مش هطول كل الحكايه 15 سنه
    وهترجع بالسلامه

     
  • At Tue Jul 10, 07:45:00 AM 2007 , Blogger أجدع واحد في الشارع said...

    انتى حد جميل جدا جدا

    ياه بجد انا عينى دمعت من كلامك

    ان شاء الله

    تطمنك عليها

     
  • At Tue Jul 10, 10:51:00 PM 2007 , Blogger yasmina said...

    يا رب بس صديقتك تقرا الكلام والمشاعر الحلوة

     
  • At Wed Jul 11, 03:09:00 AM 2007 , Blogger ياسمين said...

    هو لسة فى ناس بتحب بعض كدة
    هو لسة فى ناس حساسة كدة
    هو فلسة فى ناس مخلصة كدة

    تعرفى انا لية واحدة صاحبتى بقالنا عمر طويل أصحاب من واحنا صغيرين بنلعب بالعرايس

    ولسة مع بعض وهنفضل انشاء الله مع بعض

    على فكرة هى قاعدة جنبى دلوقتى وانا بأكتبلك الكومنت

    بايتين مع بعض

    هى العزيزة المدونة سهر الليالى

    تعرفى لما قريت البوست حسيت انى نفسى اكون صاحبتك دى

    ينفع

     
  • At Wed Jul 11, 03:56:00 AM 2007 , Blogger voice of love said...

    رغدة

    حبيبة قلبى
    ميرسى لوجودك معايا
    أتمنى انها تفتكر تسأل عنى
    وتعرف انى جنبها على طول
    أبوسك

    بوسى

    ميرسى على كلامك الجميل
    تخيلى كل الناس دخلت شافت البوست الا هى
    يلا .. ما علينا
    انتى الأجمل بجد




    أجدع واحد

    أشكرك على رقتك
    وربنا يسمع منك


    ياسمينا

    يارب تقراه
    والنبى اللى يعرفها يروح يوصيها عليا


    ياسمين
    حبيبتى ونور عينى
    طبعا ينفع ونص وتلات أرباع كمان
    وانتى خلاص صاحبتى وحبيبتى من غير تفاهم
    ميرسى لاحساسك بيا
    وربنا يخليكم لبعض

     
  • At Wed Jul 11, 06:22:00 AM 2007 , Blogger mesh2dra said...

    لسلام عليكم

    مش حزود كتير عن اللي اتقال
    لانهم قاموا بالواجب وأكتر

    ساعات بين الصحاب بيمر اوقات فتور
    متعرفيش ايه اللي بيحصل
    وخاصة لو صاحبتك دي مزاجية متقلبة

    وبما انك باقية على صداقتك دي

    ياريت تروحى تعملي عندها كومنت بما انها مدونة وانتى كاتبة الموضوع ده
    واكيد حتفهم

    أو تتصلي بيها وتقوليلها عاوزاطى ضرورى جدااااااا
    ولو هى مشغولة
    روحيلها انتى
    واتكلمي معاها
    واساليها هى ليه بعدت

    مش ممكن يكون فيه سبب وانتى مش حاسة بيه

    يعني من الآخر
    حاولي ترجعي العلاقة بقدر المستطاع
    وان ما رجعتش
    يبقى انتى عملتي اللي عليكي
    وحتيجى يوم وتفتكر محاولاتك البائسة لارجاع علاقتكم
    بس ساعتها انتى ضميرك مستريح
    لانك ما قصرتيش

    ولا تحبي
    أروح لها واقولها
    فيه حد بيحبك اوى اوى
    وصعب تلاقي حد بيحب بالطريقة دى

    سلاماتي وقبلاتي

     
  • At Wed Jul 11, 02:36:00 PM 2007 , Blogger Mirage said...

    انا مبسوط قوى انى لقيت مدونتك دى
    يمكن عشان دماغك فيها كتير من دماغى

    يعنى يوسف ادريس على ساندرا بولك وكمان ميج رايان وتيجى انغام عشان تكمل الحدوتة

    انا لسه واخد الابوم بتاع انغام من زميلى فى الشغل بالبلو تووث وهسمعه فى الطريق وانا مروح

    وهرجع اقوللك على اتمنالك الخير

     
  • At Wed Jul 11, 08:49:00 PM 2007 , Blogger wahed said...

    ان شاء الله اقرأ قريب في نفس المكان نبأعودتكم لبعض

     
  • At Wed Jul 11, 09:01:00 PM 2007 , Blogger مدونة محمد يوسف said...

    كلمات جميلة عن الصداقة ندرت معانيها النقية فى وقتنا الحالي الذي طغت عليه المادية
    تحياتى لكى وشكرا على كلماتك التي تعد نداءا صارخا للصداقة ان تعود من جديد في ثوبها الحقيقي النقي المبرء من المصالح والنفاق
    خالص تحياتى يا دكتورة
    محمد يوسف
    MMYOUSSIF@YAHOO.COM

     
  • At Thu Jul 12, 03:04:00 AM 2007 , Blogger voice of love said...

    مش قادرة

    انا فعلا كلمتها أكتر من مرة
    بس للأسف هى بطلت تسأل عليا
    أنا باقية عليها لآخر نفس
    أنا فعلا بحبها جدا
    ياريت تقوليلها ترجع لقلبى ومكانها لسه زى ما هوه جواه
    ولو كنت غلطانة فى حقها تسامحنى


    ميراج

    أنا مبسوطة أكتر بزيارتك ونورتنى
    شكلنا بقينا كده أصحاب خلاص

    واحد
    ربنا يسمع منك
    نورتنى


    محمد يوسف
    أهلا أهلا يا دكتور
    منور الدنيا بحالها
    سعيدة جدا بتشريفك لمدونتى المتواضعة
    خالص تحياتى

     
  • At Thu Jul 12, 01:25:00 PM 2007 , Blogger طهقان said...

    ألرسالة وصلت
    ووقعت في ايديا
    وانا هاوصلها بعون الله لصاحبتك
    بس ماتزعليش منها
    اصلها اليومين دول تعبانة شوية ومشغولة

    قطيعة

    ماحدش بياكلها بالساهل يا داليا

     
  • At Thu Jul 12, 02:40:00 PM 2007 , Blogger voice of love said...

    طهقان

    أشكر لك وجودك بشدة
    ياريت توصلها الرسالة مادام هى مش بتكلف نفسها وتدخل عندى
    ولو هى تعبانة ومشغولة زى ما بتقول
    يبقى كان عندها الوقت والنشاط منين انها تعمل مدونة جديدة
    وبعديم ما أنا كمان تعبانة ومشغولة وعندى مشاكل بس بفتكر أسأل عليها
    عموما برضه : أتمنى لها الخير
    وأشكرك مرة تانية وياريت متكونش آخر مرة وتنورنى دايما
    تحياتى

     
  • At Fri Jul 13, 11:38:00 AM 2007 , Blogger truelove said...

    أول زيارة لمدونتك ومكنتش اعرف انك بالرقة دي ربنا يوفقك ياقمر واتمني تنوريني تحياتي ليكي

     
  • At Fri Jul 13, 06:11:00 PM 2007 , Blogger Eman Eltaher said...

    كلماتك معبرة

    و رغم انها رسالة شخصية
    بس كلنا لازم أكيد نشاركك الدهشة من موقف صديقتك
    و عموما أتمنى انها تقراه
    و أتمنى علاقتكم تستمر بخير بعد كده
    بس اسمحيلى

    بيتهيالى لو قلتيلها مباشرة انك مفتقداها او سألتى عن سبب غياها هيبقى أنسب
    لانه احتمال انها مثلا متقراهوش

    عموما بحييكى على كلماتك

     
  • At Sat May 31, 10:55:00 AM 2008 , Blogger esraa negm said...

    نفسي أكون زيك في جمال إحساسك يا داليا رغم إني معرفكيش معرفة شخصية لكن والله بجد حاسة بكلامك يمكن عشان أنا مريت بالموقف نفسه بس أنا قررت أبعد أنا كمان لأني حسيت إني بفرض نفسي..
    بجد ياداليا يا بخت صحابك بيكي إنتي حد ماتتسابيش ابدا..
    نسيت أسألك بعد سنة ياترى رجعت لك صديقتك ولا لسة؟؟؟

     
  • At Wed Jul 20, 03:29:00 AM 2016 , Blogger Zheng junxai5 said...

  • At Wed Jul 20, 03:29:00 AM 2016 , Blogger Zheng junxai5 said...

Post a Comment

Subscribe to Post Comments [Atom]

Links to this post:

Create a Link

<< Home